Ավելի քան 830 հազար լիբանանցիներ ստիպված են եղել լքել իրենց տները «Հեզբոլլահ» շարժման և Իսրայելի միջև հակամարտության և Մերձավոր Արևելքում իրավիճակի վատթարացման պատճառով։ Այս մասին հայտնում է Լիբանանում ՄԱԿ-ի հումանիտար հարցերի համակարգման գրասենյակը։
«2023 թվականի հոկտեմբերի 8-ից ի վեր եղել է 834 746 ներքին տեղահանված անձ, որոնցից 52%-ը կանայք են, իսկ 48%-ը՝ տղամարդիկ»,- ասվում է զեկույցում։
Փաստաթղթում նշվում է նաև, որ տեղահանվածներից 189298-ը ժամանակավորապես տեղավորված են 1100 ապաստարաններում, որոնցից 935-ը կամ 84%-ն արդեն ամբողջությամբ զբաղեցված է։
Սեպտեմբերի 23-ին Իսրայելը սկսեց «Հյուսիսի նետեր» գործողությունը «Հեզբոլլահ»-ի ուժերի դեմ, որի ընթացքում լայնածավալ ավիահարվածներ հասցրեց կազմակերպության ռազմական օբյեկտներին Լիբանանի տարածքում: Սեպտեմբերի 27-ին տեղի ունեցած պայթյուններից մեկի հետեւանքով Բեյրութում սպանվել է «Հեզբոլլահի» առաջնորդ Հասան Նասրալլահը։
