ԱՄՆ նախագահ Դոնալդ Թրամփը կրկին հայտարարել է, որ ամերիկյան ուժերը կսկսեն հարվածներ հասցնել Լատինական Ամերիկայի ցամաքային թիրախներին՝ թմրավաճառների դեմ պայքարելու համար։
Ֆլորիդայի իր Մար-ա-Լագո կալվածքում ելույթ ունենալով՝ ամերիկացի առաջնորդը նշել է, որ ամերիկյան զինվորականների կողմից ձեռնարկված միջոցառումների արդյունքում ծովային ճանապարհով Միացյալ Նահանգներ թմրանյութերի մաքսանենգության ծավալը կրճատվել է 96%-ով։
«96%-ով, պարզապես մտածեք դրա մասին։ Հիմա մենք դա կանենք ցամաքում»,-ավելացրել է Թրամփը՝ անդրադառնալով թմրամիջոցների կարտելների հետ կապված ցամաքային թիրախներին հարվածելու հնարավորությանը:
Վերջին շաբաթներին Թրամփը բազմիցս հայտարարել է, որ Վաշինգտոնը կսկսի պայքարել Լատինական Ամերիկայից ցամաքային ճանապարհով թմրանյութերի մաքսանենգության դեմ։
