Իսպանիայի ՆԳՆ-ն հայտարարել է, որ խզում է իսրայելական ընկերությունից զինամթերք գնելու պայմանագիրը՝ ընդլայնելով Իսրայելին զենք չվաճառելու Իսպանիայի պարտավորությունը՝ ներառյալ գնումները:
Ավելի վաղ «Cadena Ser» ռադիոկայանը հայտնել էր, որ քաղաքացիական ոստիկանությունը համաձայնել է «Guardian LTD Israel»-ից գնել 6 միլիոն եվրո արժողությամբ ավելի քան 15 միլիոն 9 մմ տրամաչափի փամփուշտ:
«Իսպանիայի կառավարությունը շարունակում է հավատարիմ մնալ Իսրայելի պետությանը զենք չվաճառելու պարտավորությանը՝ Գազայում զինված հակամարտության սկսվելուց ի վեր։ Չնայած այս դեպքում խոսքը ռազմամթերքի գնման մասին է, սակայն ՆԳՆ-ն վարչական վարույթ է հարուցել գնումը չեղարկելու համար»,- ասվում է հայտարարության մեջ։
Նախարարությունը հայտնել է, որ իսրայելական ընկերությունները նույնպես կբացառվեն բոլոր ընթացիկ մրցույթներից։
