Եվրոպական երկրների ներմուծած ռուսական գազի ծավալները 2025-ի հունվար–նոյեմբեր ամիսներին աճել են 7,8 տոկոսով՝ «Թուրքական հոսք» խողովակաշարով իրականցված մատակարարումների հաշվին։ Ինչպես հայտնում է ТАСС-ը՝ հղում անելով Եվրոպական գազատրանսպորտային համակարգերի օպերատորների ցանցի (ENTSOG) տվյալներին, ԵՄ երկրներ այս ուղղությամբ հասցվել է 16,3 միլիարդ խմ գազ։
Հոկտեմբերին գրանցվել է մատակարարումների տարվա ռեկորդը, իսկ նոյեմբերին ցուցանիշը նվազել է 3 տոկոսով ամսական դինամիկայում, սակայն տարեկան կտրվածքով աճել է 10 տոկոսով։
«Թուրքական հոսք»-ի հարավային ճյուղը մնում է Ռուսաստանի գազամատակարարման միակ խողովակաշարային ուղին Եվրոպա, քանի որ «Հյուսիսային հոսք»-ի մի մասի վնասումից և Ուկրաինայի տարածքով տարանցման դադարից հետո այլ երթուղիներ չեն գործում։ Այս մատակարարումներից կախված են փաստացի մի շարք երկրներ, այդ թվում՝ Թուրքիա, Հունգարիա, Սերբիա և Սլովակիա։
Ռուսական գազի ներկրման աճը ֆիքսվում է այն պայմաններում, երբ ԵՄ-ն պաշտոնապես որդեգրել է արագացված ռազմավարություն՝ նվազեցնելու կախվածությունը Ռուսաստանի էներգակիրներից։ Թարմացված ծրագրով ԵՄ-ն նպատակ ունի հասնել ռուսական գազից զրոյական կախվածության մինչև 2027 թվականի հունվարի 1-ը։ Որպես այլընտրանք, Ֆինլանդիայի նախագահը նշել է, որ Եվրոպայի համար առաջիկա տարիներին առանցքային էներգետիկ գործընկեր կարող է դառնալ Կազախստանը։
