Հունգարիայի կառավարությունը վարում է անկախ արտաքին քաղաքականություն և Ռուսաստանի հետ բանակցելու համար ԵՄ թույլտվության կարիք չունի։ Այս մասին հայտարարել է Հունգարիայի արտաքին գործերի և առևտրի նախարար Պետեր Սիյարտոն՝ արձագանքելով Գերմանիայի կանցլեր Ֆրիդրիխ Մերցի այն հայտարարությանը, որ վարչապետ Վիկտոր Օրբանը Մոսկվա է այցելել առանց ԵՄ առաջնորդների հաստատման։
«Մենք՝ հունգարացիներս, Բրյուսելի, Բեռլինի կամ որևէ այլ անձի թույլտվության կամ մանդատի կարիք չունենք արտասահմանում բանակցություններին մասնակցելու համար։ Անկախ նրանից, թե Բրյուսելը դա դուր է գալիս, թե ոչ, մենք վարում ենք ինքնիշխան արտաքին քաղաքականություն, և մեր որոշումները կայացվում են ելնելով ազգային շահերից», – գրել է արտգործնախարարը Facebook-ում։
Նոյեմբերի 28-ին, Կրեմլում Ռուսաստանի նախագահ Վլադիմիր Պուտինի հետ հանդիպման սկզբում, Օրբանը հայտարարել է, որ Հունգարիան վարում է անկախ արտաքին քաղաքականություն, չի ենթարկվի արտաքին ճնշմանը և կշարունակի համագործակցել Ռուսաստանի հետ բազմաթիվ ոլորտներում։
