Պակիստանի հյուսիս-արևելքում գտնվող Ֆեյսալաբադ քաղաքի գործարանում գազի պայթյունի հետևանքով զոհվել է առնվազն 15 մարդ, հայտնում է Geo TV-ն՝ հղում անելով քաղաքային իշխանություններին։
«Փրկարարները մինչ այժմ փլատակներից դուրս են բերել 15 մարմին, իսկ յոթ վիրավոր տեղափոխվել է հիվանդանոց։ Կան մտավախություններ, որ փլատակների տակ ավելի շատ մարդիկ են թաղված։ Փրկարարները զբաղված են փլատակների մաքրմամբ։ Շրջանային ոստիկանության բոլոր ուժերը ներգրավված են փրկարարական աշխատանքներին», - ասել է Ֆեյսալաբադի կոմիսար Ռաջա Ջահանգիր Անվարը։
Ուրբաթ օրը, ժամը 5-ի սահմաններում, Ֆեյսալաբադի Մալիկպուր շրջանում գտնվող սոսնձի գործարանում պայթյուն է տեղի ունեցել, որի հետևանքով շենքը փլուզվել է, իսկ մոտակա շենքերը մեծ վնասներ են կրել։
Պաշտոնյան հայտնել է, որ նախնական տեղեկությունների համաձայն՝ գործարանում պայթյունը տեղի է ունեցել գազատարի պատռվածքի պատճառով։ Նա հավելել է, որ պայթյունի հետևանքով զոհվածները հիմնականում գործարանի մոտակայքում գտնվող տների բնակիչներ են։
