Թուրքիայում փորձագետները հետաքննում են այն հնարավորությունը, որ Վրաստանում կործանված ռազմական ինքնաթիռը կարող է խոցված լինել, ասել է կառավարամետ թուրքական «Հյուրիեթ» թերթի սյունակագիր Աբդուլքադիր Սելվին, որը մոտ է կառավարական շրջանակներին։
Թուրքիայի պաշտպանության նախարարությունն ավելի վաղ հայտնել էր, որ երեքշաբթի օրը Վրաստանում վթարի է ենթարկվել Lockheed C-130 Hercules ռազմական տրանսպորտային ինքնաթիռ, որի հետևանքով զոհվել է 20 զինծառայող։
Անկարան որոնողական-փրկարարական գործողությունները համակարգում է Թբիլիսիի հետ։ Թուրքիայի նախագահ Ռեջեփ Թայիփ Էրդողանի վարչակազմը հայտարարել է, որ ավիավթարի պատճառների հետաքննությունը կանցկացվի առավելագույն զգուշությամբ։
«Մեր ինքնաթիռը կործանվե՞լ է, թե՞ խփվել է։ Մանրակրկիտ հետաքննություն է ընթանում։ Հետաքննվում է թե՛ ինքնաթիռի կործանման, թե՛ խփվելու հավանականությունը», - գրել է Սելվին իր սյունակում հինգշաբթի օրը։
