Հոկտեմբերի 28-ին Մարդու իրավունքների պաշտպան Անահիտ Մանասյանը մասնակցել է «Արդարադատության մատչելիություն հաշմանդամություն ունեցող անձանց համար» խորագրով միջոցառմանը և հանդես եկել բացման խոսքով։ Այս մասին հայտնում են Պաշտպանի աշխատակազմից։
«Իր ելույթում Պաշտպանը նշել է, որ Հայաստանում հաշմանդամություն ունեցող անձանց իրավունքների ապահովման հետ կապված խնդիրները բազմաթիվ են:
Հայաստանում, ցավոք, ահռելի ծավալի են հասնում կարծրատիպերն ու խարանը՝ կապված հաշմանդամություն ունեցող անձանց նկատմամբ վերաբերմունքի, նրանց հաշմանդամություն ունենալու հանգամանքի և համանման այլ հարցերի հետ։ Սա նկատում եմ ամենօրյա ռեժիմով՝ ոչ միայն տարբեր խմբերի հետ շփումների ընթացքում, այլև անձնական շփումներում։ Մարզային այցերիս ժամանակ կարևորագույն օրակարգային հանդիպումներից մեկը մշտապես լինում է ոլորտային հասարակական կազմակերպությունների, ինչպես նաև հաշմանդամություն ունեցող անձանց և նրանց ընտանիքի անդամների հետ։ Այդ հանդիպումների ընթացքում ակնհայտ է դառնում, որ կարծրատիպերը դեռևս մեծ ծավալով շարունակվում են», – նշել է Պաշտպանը։
Անահիտ Մանասյանը շեշտել է, որ իրական փոփոխությունների հասնելու համար անհրաժեշտ է արմատական փոփոխություն կրթական համակարգում, մասնավորապես՝ մարդու իրավունքների կրթության ոլորտում։
«Ամենակարևորն այսօր այն է, որ կրթական համակարգը, մասնավորապես, մարդու իրավունքների կրթությունը, ենթարկվի համապարփակ և խորքային վերափոխման։ Միայն այդ ճանապարհով կարող ենք ձևավորել հանդուրժող, ներառական հասարակություն՝ ազատ խարաններից և կարծրատիպերից», – ընդգծել է Մարդու իրավունքների պաշտպանը։
Նա նաև անդրադարձել է մատչելիության խնդիրներին՝ նշելով, որ Պաշտպանի աշխատակազմի կողմից իրականացվող մշտադիտարկումների արդյունքները վկայում են մատչելի միջավայրի շարունակական խնդիրների մասին։
«Մեր մշտադիտարկումները ցույց են տալիս, որ որոշ պետական ինստիտուտներ, ինչպես նաև արդարադատության շղթայում ներգրավված շենք-շինությունները դեռևս մատչելի չեն։ Ավելին՝ անգամ նոր կառուցվող կամ վերակառուցվող շինությունները հաճախ չեն համապատասխանում գործող ստանդարտներին։ Սա անթույլատրելի է, քանի որ յուրաքանչյուր քաղաքացի պետք է կարողանա իրացնել իր իրավունքները՝ առանց խոչընդոտների և խտրականության», – նշել է Անահիտ Մանասյանը։
Բացման խոսքով հանդես է եկել նաև Հայաստանում Կանադայի դեսպան Էնդրյու Թըրները։
Քննարկումը կազմակերպել է «Հաշմանդամություն ունեցող անձանց իրավունքների օրակարգ» հասարակական կազմակերպությունը
«Հաշմանդամություն ունեցող անձանց համար արդարադատության հավասար մատչելիության խթանում» ծրագրի շրջանակում, որն իրականացվում է Կանադայի տեղական նախաձեռնությունների հիմնադրամի աջակցությամբ»,-ասված է հաղորդագրության մեջ։
