Թաիլանդի վարչապետ Անութհին Չանվիրակունը չեղարկել է Հարավարևելյան Ասիայի Ազգերի Ասոցիացիայի (ԱՍԵԱՆ) միջոցառումներին մասնակցելու համար Կուալա Լումպուր կատարած իր այցը՝ Թաիլանդի միապետ Մահա Վաջիրալոնգկորնի (Ռամա X) մոր՝ Սիրիկիտ թագուհու մահվան պատճառով։ Այս մասին հաղորդում է Thai PBS-ը։
Հեռուստաալիքի տվյալներով՝ եթե սահմանային հակամարտության խաղաղ կարգավորման հիմքը դնելու նպատակով Թաիլանդի և Կամբոջայի միջև հարաբերությունների կառուցման սկզբունքների վերաբերյալ համատեղ հռչակագրի նախատեսված ստորագրման արարողությունը հնարավոր չլինի հետաձգել, վարչապետը կհանձնարարի Թաիլանդի արտաքին գործերի նախարար Սիխսակ Ֆուանգկետակեուին ստորագրել այն։
Թագավորական տան գրասենյակի տվյալներով՝ Սիրիկիտ թագուհին մահացել է ուրբաթ օրը՝ 93 տարեկան հասակում։ Թաիլանդի վարչապետը հայտարարել է, որ պետական մարմիններում դրոշները 30 օր կխոնարհվեն։ Պետական ծառայողները և պետական հաստատությունների աշխատակիցները մեկ տարի կկրեն սգո հագուստ։
