ԱՄՆ փոխնախագահ Ջ.Դ. Վենսը հայտարարել է, որ պաղեստինյան ՀԱՄԱՍ-ի շարժման զինաթափումը դժվար խնդիր է։
«Մենք մեր առջև շատ, շատ դժվար խնդիր ունենք՝ զինաթափել Համասին, բայց, միևնույն ժամանակ, վերականգնել Գազան, բարելավել Գազայի բնակիչների կյանքը և ապահովել, որ ՀԱՄԱՍ-ը այլևս սպառնալիք չներկայացնի մեր ընկերների համար Իսրայելում։ Դա հեշտ չէ», - ասել է Վենսը Իսրայելում վարչապետ Բենիամին Նեթանյահուի հետ մամուլի ասուլիսի ժամանակ։
ԱՄՆ փոխնախագահը նշել է, որ Գազայի համաձայնագիրը կարող է ծառայել որպես մոդել աշխարհի այլ խաղաղության համաձայնագրերի համար։ Վենսը նաև ընդգծել է իր լավատեսությունը, որ հրադադարը կպահպանվի։
Վենսը Իսրայել է ժամանել երեքշաբթի օրը, իսկ մի քանի օր առաջ երկիր են ժամանել Գազայի հակամարտության հարցերով ԱՄՆ դեսպան Սթիվ Ուիթքոֆը և ԱՄՆ նախագահի փեսան՝ Ջարեդ Քուշները։
