Գերմանիայի արտաքին գործերի նախարար Յոհան Վադեֆուլը ողջունել է Ռուսաստանի և ԱՄՆ նախագահներ Վլադիմիր Պուտինի և Դոնալդ Թրամփի միջև Բուդապեշտում կայանալիք հանդիպումը։
«Ընդհանուր առմամբ, ես լավ զարգացում եմ համարում այն, որ բանակցությունները վերջապես կշարունակվեն», - լրագրողներին ասել է Վադեֆուլը՝ Թուրքիա մեկնելուց առաջ։
Նա նշել է, որ Պուտինի և Թրամփի միջև այս հանդիպումը համարում է նախնական քայլ դեպի Ռուսաստանի և Ուկրաինայի միջև ուղիղ բանակցություններ:
«Եթե սա անցկացվում է խաղաղության բանակցություններ վարելու հստակ նպատակով, ապա հանդիպման անցկացումը Բուդապեշտում ընդունելի է», - ասել է նա՝ անդրադառնալով ռուս-ամերիկյան առաջիկա գագաթնաժողովի վայրին:
Հինգշաբթի օրը, Պուտինի հետ հեռախոսազրույցից հետո, Թրամփը հայտարարեց, որ նրանք համաձայնել են շուտով հանդիպել Բուդապեշտում: Ռուսաստանի նախագահի օգնական Յուրի Ուշակովը նույնպես հայտարարեց, որ Մոսկվան և Վաշինգտոնը «անհապաղ» կսկսեն նախապատրաստվել Ռուսաստանի և ԱՄՆ առաջնորդների միջև նոր հանդիպմանը, որը կարող է տեղի ունենալ Հունգարիայի մայրաքաղաքում։
