ՊՍԺ-ի գլխավոր մարզիչ Լուիս Էնրիկեն մեկնաբանել է թիմի ֆուտբոլիստներ Վիտինյայի և Խվիչա Կվարացխելիայի վնասվածքները, որոնք նրանք ստացել են Լիգա 1-ի «Օսերի» դեմ խաղում։ Մարզիչը նշել է, որ թիմը պետք է հանգստություն պահպանի՝ չնայած բազմաթիվ վնասվածքներին։
Այս մասին տեղեկանում ենք armsport.am կայքից։-Չեմ կարող կոնկրետ բան ասել Վիտինյայի և Կվարացխելիայի վնասվածքների մասին։ Իրավիճակը լավատեսական չի թվում, բայց պետք է սպասենք բժշկական շտաբի եզրակացությանը՝ վաղը կամ մյուս օրը, որպեսզի հասկանանք վնասվածքների լրջությունը։ Սակայն սա բնական է։ Մենք պետք է հանգիստ մնանք, հաղթահարենք դժվարությունները թիմային ոգով, երկրպագուների աջակցությամբ և ակումբի երիտասարդ խաղացողներին խաղադաշտ դուրս բերելով,- ասել է Էնրիկեն RMC Sport-ին։Սեպտեմբերի 27-ին՝ շաբաթ օրը, ՊՍԺ-ն Լիգա 1-ի 6-րդ տուրում 2:0 հաշվով հաղթեց «Օսերին»։ Վիտինյան խաղադաշտը լքել է 35-րդ րոպեին, իսկ Կվարացխելիան փոխարինվել է ընդմիջման ժամանակ։ Ավելի վաղ վնասվածքներ էին ստացել Ուսման Դեմբելեն, Մարկինյոսը, Դեզիրե Դուեն և Ժոաու Նևեշը։Հոկտեմբերի 1-ին ՊՍԺ-ն Չեմպիոնների լիգայի լիգայի փուլի 2-րդ տուրում արտագնա խաղում կմրցի «Բարսելոնայի» հետ։
2025/26 մրցաշրջանում Խվիչա Կվարացխելիան բոլոր մրցաշարերում անցկացրել է 7 խաղ և խփել 1 գոլ։ Վիտինյան 4 խաղում խփել է 1 գոլ և կատարել 4 գոլային փոխանցում։
