Երևանի ընդհանուր իրավասության դատարանը մեղավոր ճանաչեց Հայ Առաքելական եկեղեցու Շիրակի թեմի առաջնորդ Միքայել արքեպիսկոպոս Աջապահյանին։ Այս մասին հայտնեց դատավոր Արմինե Մելիքսեթյանը՝ հրապարակելով դատավճռի եզրափակիչ հատվածը։
«Դատավորի հետևությունն այն է, որ Միքայել արքեպիսկոպոս Աջապահյանին պետք է մեղավոր ճանաչել ՀՀ Քրեական օրենսգրքի 422-րդ հոդվածի 2-րդ մասով առաջադրված մեղադրանքում», -հայտարարեց Մելիքսեթյանը։
Վճռով ուժի մեջ է թողնվել նաև խափանման միջոց կալանքը՝ խիստ սահմանափակումներով։ Լրացուցիչ դատալսումներ նշանակվել են սեպտեմբերի 29-ին՝ ժամը 15։30-ին։
Միքայել արքեպիսկոպոս Աջապահյանի նկատմամբ քրեական հետապնդում էր հարուցվել ՀՀ Քրեական օրենսգրքի 422-րդ հոդվածի 2-րդ մասով՝ իշխանությունը զավթելուն, տարածքային ամբողջականությունը խախտելուն, ինքնիշխանությունից հրաժարվելուն կամ սահմանադրական կարգը բռնի տապալելուն ուղղված հրապարակային կոչերի համար։ Նա կալանավորված է հունիսի 28-ից։
Օգոստոսի 28-ին կայացած դատական նիստի ընթացքում դատախազը միջնորդել էր Միքայել արքեպիսկոպոս Աջապահյանին մեղավոր ճանաչել իշխանությունը զավթելուն, տարածքային ամբողջականությունը խախտելուն, ինքնիշխանությունից հրաժարվելուն կամ սահմանադրական կարգը բռնի տապալելուն ուղղված հրապարակային կոչեր հնչեցնելու հոդվածով։
Միքայել արքեպիսկոպոս Աջապահյանը չի ընդունում իրեն առաջադրված մեղադրանքը։
