ԱԺ պատգամավոր Հովիկ Աղազարյանը նույնպես մասնակցում է Շիրակի թեմի առաջնորդ Միքայել Աջապահյանի գործով դատական նիստին։ Լրագրողների հետ զրույցում նախկին ՔՊ–ական պատգամավորը կարծիք հայտնեց, որ Միքայել Սրբազանին մեղավոր կճանաչեն։
Հարցին, թե ի՞նչն է դրդել նրան գալ դատական նիստին, մեղքի զգացո՞ւմը, նա պատասխանեց․ «Ի տարբերություն Սրբազանի՝ ես ավելի պայքարող դիրքերում եմ այդ իմաստով։ Մենք իրեն առաջարկեցինք վարչապետի թեկնածու իմպիչմենտի համար, ինքը չհամաձայնեց։ Ես Սրբազանին ճանաչել եմ իր հրապարակային ելույթներով մի քանի տարի առաջ, իրեն համակրել եմ որպես ոչ թե հոգևորականի, այլ որպես քաղաքացու, որպես հասարակական գործչի։ Հետևաբար պատահական չէ իմ վերաբերմունքն իր նկատմամբ»,– ասաց Աղազարյանը։
Անդրադառնալով եթերում ԱԺ նախկին պատգամավոր Գևորգ Պետրոսյանի հետ «Նիկոլ Փաշին» արտահայտության պատճառով վիճաբանությանը՝ Աղազարյանը նշեց, որ իր համար տհաճ է, երբ իր ներկայությամբ վիրավորում են մեկ ուրիշին․ «Եթե այդ մարդն այդտեղ չէ, որպեսզի կարողանա արձագանքել կամ պատասխան տալ, դա համարում եմ վիրավորանք իմ նկատմամբ։
Առավել ևս մինչև բանավեճի սկսվելը, հաշվի առնելով իր վերաբերմունքը շատ–շատերի նկատմամբ, այդ թվում՝ նաև իմ, խնդրել էի Գևորգ Պետրոսյանին, որ որևէ վիրավորական խոսք իմ նախկին գործընկերների հետ կապված չհնչի։
Ինքը համաձայնվել էր, հետո շարունակեց, այդպես ստացվեց»,– ասաց նա։
