Սպիտակ տունը փնտրում է միջոց՝ խուսափելու Կոնգրեսում Պաշտպանության նախարարությունը Պատերազմի նախարարություն վերանվանելու վերաբերյալ քվեարկությունից, հաղորդում է Politico-ն՝ հղում անելով տեղեկացված աղբյուրին։
Ավելի վաղ ԱՄՆ նախագահ Դոնալդ Թրամփը ստորագրել էր գործադիր հրամանագիր, որով ԱՄՆ պաշտպանության նախարարությունը վերանվանվել էր Պատերազմի նախարարություն, ինչը, նրա խոսքով, արտացոլում է աշխարհում տիրող իրավիճակը։
«Անվան պաշտոնական փոփոխությունը, հավանաբար, կպահանջի Կոնգրեսի հաստատումը, չնայած քննարկումներին ծանոթ անձը նշում է, որ Սպիտակ տունը փնտրում է Կոնգրեսի քվեարկությունից խուսափելու եղանակներ», - գրում է հրատարակությունը։
Նրա խոսքով՝ Պենտագոնի պաշտոնյաները զայրույթ, հիասթափություն և շփոթմունք են հայտնում ԱՄՆ Պաշտպանության նախարարության վերանվանման որոշման վերաբերյալ, որը կարող է միլիարդավոր դոլարներ արժենալ՝ 40 երկրներում և ԱՄՆ յուրաքանչյուր նահանգում ավելի քան 700,000 օբյեկտներում խորհրդանիշների, ինչպիսիք են ցուցանակները, փոխելու անհրաժեշտության պատճառով։
