Դամասկոսի միջազգային օդանավակայանի մոտակայքում պայթյունների ձայները առաջացել են օդանավակայանից ավելի քան 20 կիլոմետր հեռավորության վրա գտնվող հին զինամթերքի պայթյունից, հայտնել է Սիրիայի քաղաքացիական ավիացիայի վարչությունը։
«Դամասկոսի օդանավակայանի տարածքում պայթյունի ձայները առաջացել են պատերազմից մնացած զինամթերքի պայթյունից՝ օդանավակայանից ավելի քան 20 կիլոմետր հեռավորության վրա գտնվող տարածքում», - ասվում է հաղորդագրության մեջ, որի տեքստը մեջբերում է սիրիական Sham FM ռադիոկայանը։
Գերատեսչության հայտարարության մեջ ասվում է, որ օդանավակայանը շարունակում է գործել սովորականի պես, և որ հին զինամթերքի ոչնչացումը իրականացվել է բոլոր անհրաժեշտ նախազգուշական միջոցներով։
Ավելի վաղ Սիրիայի պետական հեռուստատեսությունը, հղում անելով տեղական աղբյուրներին, հայտնել էր Դամասկոսի միջազգային օդանավակայանի մոտակայքում անհայտ ծագման պայթյունի մասին: Նրանց տվյալներով՝ պայթյունը տեղի է ունեցել «օդանավակայանի մոտակայքում գտնվող սիրիական բանակի նախկին ռազմական բազայում»:
