Կիևի Դնեպրովսկի շրջանում 36-ամյա տղամարդը ցած է ընկել բնակելի շենքի 19-րդ հարկից և ողջ է մնացել։ Այս մասին հայտնի է դարձել շաբաթ օրը՝ օգոստոսի 30-ին, հաղորդում է Korrespondent.net-ը։
«Տղամարդը տեղացի բնակիչ է։ Նա 36 տարեկան է։ Նա ցատկել է 19-րդ հարկից և վայրէջք կատարել բակում գտնվող մեքենայի տանիքին։ Տղամարդն այժմ հոսպիտալացվել է՝ փակ գանգուղեղային վնասվածք, փակ որովայնի վնասվածք և կրծքավանդակի վնասվածք ախտորոշմամբ», - TSN-ին հայտնել են Դնեպրովսկի շրջանի ոստիկանությունից։
Դեպքի բոլոր հանգամանքները ներկայումս պարզվում են։ Նախնական տեղեկություններով, տղամարդը որոշել է նման հուսահատ քայլի դիմել ինքնասպանություն գործելու նպատակով. նա չէր ուզում ապրել։ Հետաքննիչները պարզում են, թե ինչն է պատճառը։
Դեպքի վայրից լուսանկարներ և տեսանյութեր են հրապարակվել սոցիալական ցանցերում։ Կադրերում երևում է, որ տղամարդը ընկել է ուրիշի մեքենայի վրա և վնասել այն։ Սակայն մեքենան փրկել է նրա կյանքը։
Korrespondent.net-ի փոխանցմամբ՝ միջադեպը տեղի է ունեցել Վոսկրեսենսկայա փողոցի «Պարկովյե Օզերա» բնակելի համալիրում։
