Լեգենդար դարպասապահ Ռոման Բերեզովսկին չի ընդգրկվել Հայաստանի ազգային հավաքականի նոր գլխավոր մարզիչ Եղիշե Մելիքյանի մարզչական շտաբում: Այս մասին հայտնի դարձավ օգոստոսի 28-ին, երբ Հայաստանի ֆուտբոլի ֆեդերացիան պաշտոնապես հրապարակեց մարզչական շտաբում ներառված մասնագետների անունները: Այս կապակցությամբ Sputnik Արմենիան զրուցել է Ռոման Բերեզովսկու հետ, որը մինչև վերջերս հավաքականի դարպասապահների մարզիչն էր։
Շտաբում, բացի Եղիշե Մելիքյանից, ընդգրկվել են նրա օգնականներ Աղվան Այվազյանն ու Ռոման Մոնարյովը, դարպասապահների մարզիչ Ստեփան Դեմիրճյանը, ինչպես նաև ֆիզպատրաստության մարզիչ Խավիեր Մինյանոն:
«Առանձնապես բան չկա մեկնաբանելու։ Այո՛, հավաքականի նոր մարզչական շտաբում չեմ ընդգրկվի։ Այս մասով մեկնաբանություններ չկան։ Իսկ մաղթանքս է, որ թիմը առաջիկա և հաջորդ հանդիպումներում լավ խաղ ցուցադրի և դրական արդյունքի հասնի», — Sputnik Արմենիայի հետ զրույցում ասաց Հայաստանի ազգային հավաքականի նախկին դարպասապահը:
Եղիշե Մելիքյանը հավաքականի գլխավոր մարզչի պաշտոնում նշանակվել էր օգոստոսի 6-ին: 46-ամյա մասնագետի թեկնածությունն արժանացել է ՀՖՖ Գործկոմի անդամների հավանությանը: Նրա հետ պայմանագիրը կնքվել է մինչև 2026 թվականի նոյեմբեր։ Մելիքյանի նշանակումից հետո հավաքականում կարիերան ավարտելու մասին հայտարարել է թիմի երկարամյա ավագ, կենտրոնական պաշտպան Վարազդատ Հարոյանը:
Հայաստանի հավաքականն ուսումնամարզական հավաքը կսկսի սեպտեմբերի 1-ին Ֆուտբոլի ակադեմիայում:
Աշխարհի 2026 թվականի առաջնության ընտրական փուլի շրջանակում սեպտեմբերի 6-ին Հայաստանի հավաքականը Երևանում կընդունի Պորտուգալիայի ընտրանուն: Սեպտեմբերի 9-ին Եղիշե Մելիքյանի սաները կրկին Երևանում կմրցեն Իռլանդիայի հավաքականի հետ:
