Գերմանիայի կառավարությունը հայտարարել է, որ ընդունել է կամավոր զինվորական ծառայության նոր ձևի մասին օրինագիծ։
«Նախարարների կաբինետը հաստատել է զինվորական ծառայության արդիականացման մասին օրինագիծը։ Օրինագիծը նպատակ ունի ամրապնդել Բունդեսվերի կանոնավոր և պահեստազորային ուժերը՝ անվտանգության ներկայիս սպառնալիքներին հակազդելու համար», - ասվում է կառավարության հայտարարության մեջ։
Նշվում է, որ նոր զինվորական ծառայությունը հնարավորինս երկար կլինի կամավոր։ Անվտանգության իրավիճակի վատթարացման կամ կամավորական ծառայության հնարավորությունների սպառման դեպքում Գերմանիայի կառավարությունը կարող է Բունդեսթագի համաձայնությամբ վերականգնել պարտադիր զինվորական ծառայությունը։
Օրինագծով առաջարկվում է 2007 թվականի դեկտեմբերի 31-ից հետո ծնված բոլոր երիտասարդ տղամարդկանց համար սահմանել իրենց քաշի, հասակի և անձնական տվյալների վերաբերյալ հարցաթերթիկ լրացնելու պարտավորություն։
Հարցաթերթիկը կարող են լրացնել նաև կանայք՝ սեփական նախաձեռնությամբ։ Զինվորական գրանցման համակարգերը կվերադարձվեն, արդիականացվեն և թվայնացվեն։
