ԱՄՆ նախագահ Դոնալդ Թրամփը և եվրոպացի առաջնորդները համաձայնության են եկել, որ ԱՄՆ պետքարտուղար Մարկո Ռուբիոն կգլխավորի Ուկրաինայի համար անվտանգության երաշխիքներ մշակելու աշխատանքային խումբը, հաղորդում է The Wall Street Journal-ը (WSJ)՝ հղում անելով իր աղբյուրներին։
Նրանց տեղեկությունների համաձայն՝ խմբում կներառվեն ազգային անվտանգության խորհրդականներ և ՆԱՏՕ-ի ներկայացուցիչներ, իսկ ԱՄՆ-ը «համակարգող» դեր կխաղա քննարկումների գործընթացում։
Եվրոպացի պաշտոնյաները նաև WSJ-ին հայտնել են, որ անվտանգության երաշխիքները կներառեն ռազմական ներկայություն, օդային պաշտպանություն, զենքի մատակարարում և «ռազմական գործողությունների դադարեցման մոնիթորինգ»։
Աղբյուրները նշել են, որ «կան մի շարք եղանակներ», որոնցով ԱՄՆ-ն կարող է անուղղակի ռազմական աջակցություն ցուցաբերել այսպես կոչված եվրոպացի խաղաղապահներին։
