Արմեն Մարտիրոսյանը ֆեյսբուքյան իր էջում գրում է.
Մեր լուսավոր Անահիտը լքեց մեզ, միացավ իր նման հրեշտակներին: Աննկարագրելի դժվար զգացողություններ են:
Անահիտը կյանքով լեցուն ու պայծառ փոքրիկ էր: Երբ մայրիկը զանգում էր ինձ, կողքից միշտ ինձ բարևներ ու պաչիկներ էր փոխանցում: Երբ գործերով Մոսկվայում էի, առաջին անգամ հանդիպեցի իրեն ու լիքը խաղացինք: Հեռակա սիրուն կապ էր ստեղծվել:
Երբ քիչ առաջ մայրիկը զանգեց ինձ ու տեղեկացրեց փոքրիկի մահվան մասին, փորձեցի հուսադրել նրան՝ ասելով, որ նա ու իր ամուսինն ամենն արեցին իր երեխայի համար, նա ընդհատեց ինձ ու ասաց՝ ոչ ամեն ինչ. Մոսկվայից Երևան գալու ժամանակ Անահիտը շատ է ցանկացել, որ ես իրեն օդանավակայանում դիմավորեմ, բայց մայրիկը, մտածելով, որ ես շատ զբաղված եմ լինում, չէր ասել ինձ: Որքան էլ պրակտիկ ու հստակ մարդ լինեմ, ոչ մի ձև չգիտեմ էս տեղեկության հետ ինչ անեմ, շատ դժվար ա:
Մեր փոքրիկների մահից հետո զգում եմ, որ ինձնից մի կտոր նույնպես հեռանում ա...
Հոգիդ լույսերի մեջ մնա, հրաշք մարդուկ։
Հ.Գ. Նախորդ տարի հազարավոր անձանց օգնությամբ Անահիտի բուժման համար մենք մեծ դրամահավաք կազմակերպեցինք, որի օգնությամբ երեխան երկարատև բուժում ստացավ, սակայն պետք է տեղեկացնեմ, որ երեխայի վիճակի վատթարացումից հետո բուժումն ընդհատվել է և հավաքված գումարի մասը մնացել է հիմնադրամի հաշվին: Մնացած ողջ գումարը, ծնողների համաձայնությամբ ու ձեր գիտությամբ կուղղվի առողջական ծանր խնդիրներ ունեցող որևէ այլ երեխայի, վերջինիս վերաբերյալ հավելյալ կտեղեկացնենք:
