Հնագետները Երուսաղեմում հայտնաբերել են 2000 տարեկան բրոնզե մետաղադրամ, որը հատվել է Երկրորդ տաճարի կործանումից առաջ վերջին ամիսներին, մի իրադարձություն, որը կանխատեսվել էր Հիսուս Քրիստոսի կողմից Աստվածաշնչում, հաղորդում է Daily Mail-ը։
Գտածոն թվագրվում է մ.թ. 69-70 թվականներին՝ Հռոմեական կայսրության դեմ հրեական մեծ ապստամբության չորրորդ տարում։ Այս հակամարտությունը, որը հայտնի է նաև որպես Առաջին հրեա-հռոմեական պատերազմ (մ.թ. 66-73), սկսվել է կրոնական լարվածության, չափազանց հարկերի և քաղաքական ճնշումների պատճառով։
Մետաղադրամը հատվել է հրեա ապստամբների կողմից, երբ Երուսաղեմն արդեն պաշարված էր հռոմեական զորքերի կողմից։ Դիմերեսին պատկերված է գավաթ՝ եբրայերեն գրությամբ արձանագրությամբ։ Հակառակ կողմում արմավենու ճյուղ է և երկու էտրոգ՝ Սուկկոտ տոնի ծիսական ատրիբուտներ, որը նվիրված է իսրայելացիների 40-ամյա թափառումներին անապատում՝ Եգիպտոսից դուրս գալուց հետո։
Երկրորդ տաճարը ավերվել է մ.թ. 70 թվականին, երբ հռոմեացիները ճնշել են ապստամբությունը՝ ոչնչացնելով հրեական անկախության գլխավոր կրոնական կենտրոնը և խորհրդանիշը։ Մատթեոսի, Մարկոսի և Ղուկասի Ավետարանների համաձայն՝ Հիսուսը կանխատեսել է, որ «այստեղ քար քարի վրա չի մնա»՝ բառեր, որոնք ավանդաբար կապված են Տաճարի անկման հետ։
Մետաղադրամը հայտնաբերվել է Տաճարի լեռան հարավարևմտյան անկյունի մոտ։ Մասնագետների կարծիքով՝ այն լավ պահպանված է։
«Սա բրոնզե մետաղադրամ է՝ հստակ արձանագրություններով և խորհրդանիշներով։ Նման գտածոները թույլ են տալիս մեզ բառացիորեն շոշափել Երկրորդ Տաճարի վերջին օրերը և այն մարդկանց կյանքը, ովքեր հայտնվել են իրենց դարաշրջանի ամենամեծ ողբերգության կենտրոնում», - ասվում է հնագետների հայտարարության մեջ։
Թարգմանությունը՝ Euromedia24.com-ի
