Ավստրալիայի ազգային համալսարանի գիտնականները պարզել են, որ առցանց ծանոթացող զույգերը միմյանց նկատմամբ ավելի քիչ ուժեղ զգացմունքներ ունեն, քան նրանք, ովքեր անձամբ հանդիպել են: Հետազոտության արդյունքները հրապարակվել են «Տելեմատիկա և ինֆորմատիկա» ամսագրում։
Հետազոտությանը մասնակցել է տարբեր երկրներից 6646 զույգ: Կամավորների ընդհանուր թվի 16%-ը միմյանց հետ հանդիպել է առցանց: 2010 թվականից հետո հարաբերություններ սկսող զույգերի շրջանում այս ցուցանիշը աճել է մինչև 21%: Հետազոտվողներին խնդրել են խոսել հարաբերությունների որակի մասին և գնահատել իրենց զուգընկերոջ նկատմամբ ձգողության ինտենսիվությունը։
Ինտերնետ ծանոթացած մասնակիցները հայտնել են հարաբերություններից գոհունակության ավելի ցածր մակարդակի մասին: Նրանք նաև նշել են իրենց «մյուս կեսի» նկատմամբ մտերմության, կրքի և նվիրվածության ավելի ցածր մակարդակ՝ համեմատած նրանց հետ, ովքեր հանդիպել են առցանց:
Գիտնականների կարծիքով, անձամբ ծանոթացող զույգերն ավելի հակված են նույն սոցիալական արժեքներն ունենալ և աշխարհը տեսնել նման ձևով: Իդեալների, կարիքների և հետաքրքրությունների ընդհանուր համակարգը նպաստում է հարաբերություններում փոխըմբռնմանը և աջակցությանը:
Հետազոտության հեղինակները նշել են, որ ինտերնետը հնարավորություն է տալիս պոտենցիալ զուգընկերների հսկայական ընտրության, սակայն տարբերակների ավելցուկը կարող է բարդացնել ընտրությունը և նվազեցնել հարաբերությունների որակը: Բացի այդ, ժամանակի ընթացքում ժամադրությունների հավելվածները ավելի ու ավելի են օգտագործվում կարճատև հարաբերությունների համար։
«Առցանց ժամադրությունների հետ կապված մեկ այլ խնդիր է անձամբ նկատելի նախազգուշական նշանները անտեսելու ռիսկը։ Սա կարող է բացասաբար անդրադառնալ զույգի երկարաժամկետ կայունության վրա», - եզրակացրել է ուսումնասիրության գլխավոր հեղինակ, կենսաբանական մարդաբան Ադամ Բոդեն։
Թարգմանությունը՝ Euromedia24.com-ի
