Անգլիայի Պրեմիեր լիգայի առաջին տուրի խաղերը կմեկնարկեն մեկ րոպե լռությամբ՝ ի հիշատակ «Լիվերպուլի» նախկին ֆուտբոլիստ Դիոգու Ժոտայի և նրա եղբոր՝ Անդրե Սիլվայի, այս մասին հայտնում է ArmSport.am-ը՝ հղում անելով BBC-ին։
Հուլիսին Դիոգու Ժոտան և Անդրե Սիլվան, որը հանդես էր գալիս Պորտուգալիայի երկրորդ դիվիզիոնի «Պենաֆիել» ակումբում, զոհվել են Իսպանիայի հյուսիս-արևմուտքում տեղի ունեցած ավտովթարի հետևանքով։
Հաղորդագրության համաձայն՝ առաջիկա հանգստյան օրերին բոլոր ֆուտբոլիստները հանդես կգան սև ժապավեններով: «Լիվերպուլը» և «Վուլվերհեմփթոնը», որոնց կազմում հանդես է եկել Ժոտան, հանդիպումներից առաջ կանցկացնեն հատուկ արարողություններ՝ «Բորնմութի» (օգոստոսի 15) և «Մանչեսթեր Սիթիի» (օգոստոսի 16) դեմ խաղերից առաջ: «Լիվերպուլը» նախկինում դուրս է բերել շրջանառությունից Ժոտայի 20-րդ համարը՝ ի հիշատակ նրա։
Ժոտան «Լիվերպուլի» կազմում դարձել է Անգլիայի չեմպիոն, նվաճել է Անգլիայի գավաթը և Լիգայի գավաթը, ինչպես նաև Պորտուգալիայի հավաքականի կազմում երկու անգամ հաղթել է ՈւԵՖԱ-ի Ազգերի լիգայում։
