ՀՖՖ նախագահի հրաժարականի պահանջով ձերբակալված 9 երկրպագուների քրեական գործի նախաքննությունը ավարտվել է, երկրպագուները մեղադրվում են մասսայական խուլիգանության համար, հաղորդում է Euromedia24․com-ը։
Փաստորեն, երկրպագուները մեղադրվում են մի քանի րոպեով ֆուտբոլի դաշտ դուրս գալու համար, որի ժամանակ կանգնել են խոտածածկ տարածքի վրա։ Առաջիկայում գործը կուղղարկվի դատարան, և պարզ կդառնա, թե ով է ՀՖՖ նախագահի հրաժարական պահանջող տղանների գործը քննող դատավորը։
Միևնույն ժամանակ, ստադիոնի կողմից բողոք է ներկայացվել խոտածածկի մոտ 20–30 սանտիմետր հատվածի վնասման կապակցությամբ։ Սա տեղի է ունենում այն իրավիճակում, երբ երկրի միակ 4-րդ կատեգորիայի մարզադաշտում՝ Հանրապետականում, վերջերս անցկացվել է համերգ։
Ըստ քննադատների՝ հստակություն չկա՝ ինչ չափանիշներով է գնահատվում խոտածածկի վնասի ռիսկը տարբեր միջոցառումների ժամանակ, և արդյո՞ք բոլոր դեպքերում կիրառվում է նույն մոտեցումը։ Երբ երկրպագուները դուրս են գալիս դաշտ՝ ընդամենը մի քանի րոպեով, նրանց նկատմամբ հարուցվում է քրեական գործ՝ խոտածածկի վնասման համար, մինչդեռ համերգի ժամանակ, երբ խոտածածկի վրա գտնվել են հազարավոր մարդիկ, որևէ հանրային խոսք հնարավոր վնասների մասին չի հնչում։Մասնագետները նշում են, որ Հանրապետական մարզադաշտը չի համապատասխանում նմանատիպ մասշտաբային միջոցառումներ անցկացնելու չափանիշներին, և անգամ հատուկ ծածկոցների օգտագործումը չի կարող երաշխավորել, որ մարզադաշտի դրենաժային և ջրամատակարարման համակարգերը չեն վնասվի:
Հիշեցնենք, որ մարտի 1-ին «Փյունիկ»-«Արարատ-Արմենիա» հանդիպման ժամանակ ֆուտբոլասերների ակցիան ուղեկցվել է ոստիկանության կողմից ուժի կիրառմամբ, ինչի արդյունքում էլ ձերբակալվել են ֆուտբոլասերները։
Մանե Գևորգյան
