ԱՄՆ նախագահ Դոնալդ Թրամփը հայտարարել է, որ երկու ամերիկյան միջուկային սուզանավերը ավելի մոտ են Ռուսաստանին, սակայն չի նշել դրանց գտնվելու վայրը։
Օգոստոսի 1-ին Թրամփը Truth Social-ում գրել է, որ հրամայել է երկու ամերիկյան միջուկային սուզանավերը վերատեղակայել «համապատասխան տարածաշրջաններ», ենթադրաբար՝ Ռուսաստանի Անվտանգության խորհրդի փոխնախագահ Դմիտրի Մեդվեդևի հայտարարությունների պատճառով։ Թրամփը պնդել է, որ Մեդվեդևը «չափազանց սադրիչ հայտարարություններ» է արել։
«Այո, սուզանավերը ավելի մոտ են Ռուսաստանին», - ասել է նա Newsmax-ին։ «Մենք միշտ ուզում ենք պատրաստ լինել, այդ պատճառով ես երկու միջուկային սուզանավ եմ ուղարկել տարածաշրջան»։
Թրամփը հավելել է, որ իր գործողություններով ցանկանում է «համոզվել, որ Մեդվեդևի խոսքերը պարզապես խոսքեր են և ոչ թե ավելին»։
