Իտալիայի հավաքականի դարպասապահ Ջանլուիջի Դոնարումայի ապագան Չեմպիոնների լիգայի գործող գավաթակիր ՊՍԺ-ում շարունակում է մնալ հարցականի տակ։ Այս մասին հայտնում է Le Parisien-ը:
Նոր պայմանագիր կնքելու վերաբերյալ կողմերի բանակցությունները մտել են փակուղի, և ՊՍԺ-ն գործուն քայլեր է ձեռնարկում՝ նոր դարպասապահ ձեռք բերելու համար: Փարիզյան ակումբը մոտ է «Լիլից» Լյուկ Շևալյեի տրանսֆերային իրավունքը 40 միլիոն եվրոյով գնելուն:
Ավելի վաղ հաղորդվել է, որ ՊՍԺ-ն ոչ մի դեպքում չի ցանկանում, որ Դոնարումայի դեպքում կրկնվի այն, ինչ եղավ Կիլիան Մբապեի պարագայում:
ՊՍԺ-ն ցանկանում է դարպասապահի հարցը փակել մինչև «Տոտենհեմի» դեմ ՈՒԵՖԱ-ի Սուպերգավաթի խաղը, որը կկայանա օգոստոսի 13–ին։
Ջանլուիջի Դոնարուման, որը տարեկան վաստակում է մոտ 10 միլիոն եվրո, արդեն մերժել է թուրքական ակումբներից մեկի առաջարկը և սպասում է Անգլիայի Պրեմիեր լիգայի ակումբներին: Իտալացուն ձեռք բերելու հավակնորդների թվում են մանչեսթերյան ակումբները և «Չելսին»:
Իտալիա վերադառնալը Դոնարումայի համար քիչ հավանական է:
