Մամուլում արդեն քանի օր է՝ լուրեր են շրջանառվում, որ «ՋԹԲ» հոլդինգի սեփականատեր Գրիգոր Տեր-Ղազարյանը պատրաստվում է գնել ՀԷՑ-ը։ Վերջինս, հիշեցնենք, Սպարապետ Վազգեն Սարգսյանի եղբոր՝ Արմեն Սարգսյանի փեսան է։ Euromedia24-ը դիմեց Գրիգոր Տեր-Ղազարյանին տեղեկության վերաբերյալ մեկնաբանություն ստանալու համար, վերջինս էլ ասաց․
«Ընկերներ, ՀԷՑ-ն այս պահին «Տաշիր» ընկերությանն է պատկանում, որտեղ պետությունը կառավարիչ է նշանակել և որոշակի պրոցեսներ է տեղի ունենում: Հիմա հարց. ինչպե՞ս կարող եմ ես այն գնել: Խնդրում եմ ինձ, մեզ հանգիստ թողեք»: Նկատենք, որ ամեն դեպքում Գրիգոր Տեր-Ղազարյանը չհերքեց ՀԷՑ-ը գնելու մասին տեղեկությունը
Հիշեցնենք՝ դեռ հունիսի 18–ին, ՀՀ վարչապետ Նիկոլ Փաշինյանը գործարար, ՀԷՑ–ի սեփականատեր Սամվել Կարապետյանի կալանավորումից ժամեր առաջ, հայտարարեց` հասունացել է պահը, երբ «Հայաստանի էլեկտրական ցանցեր» ՓԲԸ–ն պետք է ազգայնացվի (պետականացվի)։ Փաշինյանը նաև սպառնաց ազատել ՀԷՑ-ի՝ պետության հետ չհամագործակցող աշխատակիցներին։ Հունիսի 24-ին նա հայտարարեց, որ ՀԷՑ–ի պետականացման պլանը պատրաստ է։
Հուլիսի 18-ին հայտնի դարձավ, որ ՀԾԿՀ–ն պետական վերահսկողության ծառայության պետի պաշտոնից ազատված Ռոմանոս Պետրոսյանին նշանակել է «Հայաստանի էլեկտրական ցանցեր» ընկերության ժամանակավոր կառավարիչ։ Հանձնաժողովը նաև կառավարության ներկայացրած հաղորդման հիմքով վարույթ է հարուցել ՀԷՑ–ի նկատմամբ։
Քրիստինա Մուշեղյան
