Թուրքիայի արտաքին գործերի նախարար Հաքան Ֆիդանը հայտարարել է, որ Ուկրաինայի և Ռուսաստանի միջև ուղիղ բանակցությունների շարունակության դեպքում ինքը «թունելի վերջում լույս է տեսնում» Ուկրաինայի կարգավորման գործընթացում։
«Եթե բանակցությունները շարունակվեն, թունելի վերջում լույս կլինի», - NTV-ի եթերում ասել է նախարարը։
Նրա խոսքով՝ ուկրաինական հակամարտությունն ունի «շատ լուրջ տարածաշրջանային և գլոբալ հետևանքներ»։
«Բացի մարդկային ողբերգությունից, մենք բախվում ենք մի իրավիճակի, որը կհանգեցնի միջազգային ասպարեզում ավելի մեծ պատերազմի և պառակտման։ Սա դժվար և թանկ պատերազմ է։ Պատերազմ, որում օգտագործվում է ամեն ինչ, բացի միջուկային զենքից», - նշել է Ֆիդանը։
Նա հավելել է, որ Ստամբուլում կայացած բանակցությունների երրորդ փուլի ընթացքում քննարկվել են այն պայմանները, որոնց դեպքում կարող է տեղի ունենալ առաջնորդների հանդիպումը.
«Սկզբունքային համաձայնության են հասել Թուրքիայում գագաթնաժողով կազմակերպելու վերաբերյալ, սակայն բանակցություններին մասնակցող պատվիրակությունները շատ աշխատանք կունենան անելու դիրքորոշումների տարբերության պատճառով»:
