Մեծ Բրիտանիայի կառավարությունը թույլատրել է 16 և 17 տարեկան անձանց քվեարկել խորհրդարանական ընդհանուր ընտրություններում, հայտարարել է փոխվարչապետ Անժելա Ռեյները, հաղորդում է Sky News-ը։
Նրա խոսքով՝ իշխանությունները քայլեր են ձեռնարկում ընտրություններին մասնակցելու խոչընդոտները վերացնելու համար։ Համապատասխան որոշումը թույլ կտա ավելի շատ քաղաքացիների մասնակցել բրիտանական ժողովրդավարական գործընթացներին, նշել է Ռեյները։
Քաղաքական գործիչը շեշտել է, որ Լեյբորիստական կուսակցության կառավարությունը, այսպիսով, կատարում է դեռահասներին ընտրական իրավունք տալու իր նախընտրական խոստումը: Առաջարկը մոտ ապագայում կներկայացվի խորհրդարան:
Sky News-ը նշում է, որ վերջին անգամ թագավորությունում ընտրական տարիքը իջեցվել է 1969 թվականին՝ 21-ից մինչև 18: Ներկայումս 16 և 17 տարեկան բրիտանացի քաղաքացիներն իրավունք ունեն քվեարկել Շոտլանդիայի և Ուելսի տեղական ընտրություններում: Նոր օրենքի ընդունումից հետո Անգլիայի և Հյուսիսային Իռլանդիայի բնակիչները նույնպես կկարողանան մասնակցել տեղական քվեարկությանը:
