Վրաստանի կառավարության ղեկավար Իրակլի Կոբախիձեն, ի պատասխան ԵՄ դիվանագիտության ղեկավար Ժոզեպ Բորելի քննադատության, «վիրավորական» է անվանել Վրաստանը բացասական համատեքստում Մոլդովայի հետ համեմատելը, գրում է Sputnik Georgia-ն։
Ինչպես հայտարարել է Բորելը, Մոլդովայի հետ համեմատած՝ Վրաստանում պատկերը մռայլ է։ Վրաստանի իշխող կուսակցության գործողությունները, հայտարարությունները և նախընտրական խոստումները երկիրը հեռացնում են եվրոպական ուղուց և մատնանշում են ավտորիտարիզմի անցում։
«Հետևաբար, ԵՄ-ին անդամակցելու գործընթացը դե ֆակտո կասեցված է»,-ասել է նա: «Այս հայտարարությունները ժամանակավոր են։ Մենք առանձնահատուկ ուշադրություն չենք դարձնի այս հայտարարություններին։ Ինչ վերաբերում է Վրաստանն ու Մոլդովան համեմատելուն, դուք գիտեք, որ Վրաստանը առաջ է Մոլդովայից բոլոր առումներով՝ լինի դա ժողովրդավարություն, մարդու իրավունքներ, տնտեսություն»,- ասել է Կոբախիձեն։
«Ինչ վերաբերում է ժողովրդավարությանը և մարդու իրավունքներին, պետք է հիշել, որ Մոլդովայում քաղաքական կուսակցություններն ու լրատվամիջոցներն արգելվել են, և մնացել է ընդամենը երկու լրատվամիջոց»,- ասել է Կոբախիձեն:
