Այս գործընթացը չի ենթադրում որևէ մեկի կարծիք լսել: Այս մասին այսօր՝ հոկտեմբերի 14-ին, Ջոն Կիրակոսյանի անվան թիվ 20 դպրոցի տնօրենի ԺՊ նշանակելուց հետո լրագրողների հետ զրույցում հայտարարեց քաղաքապետարանի հանրակրթության վարչության պետ Մարգարիտ Խաչատրյանը՝ անդրադառնալով դիտարկմանը, որ դպրոցի տնօրենի պաշտոնակատար նշանակվել է առանց կոլեկտիվի ու ծնողների կարծիքը հաշվի առնելու: Այս մասին գրում է News.am–ը։
Նրա խոսքով, նշանակված անձը շարունակելու է աշխատել ուսուցիչների ու ծնողների հետ, ինչը շատ կարեւոր է. «Քաղաքապետի որոշումն է։ Ներսում աշխատանքային գործընթաց էր, որևէ քննադատություն չի հնչել։ Ընդունման-հանձնման նախնական փուլն է։ Դպրոցը չուներ տնօրենի ժամանակավոր պաշտոնակատար, պարտականությունները կատարումը վերապահված էր աշխատակիցներից մեկին՝ Լարիսա Մովսիսյանին, նա առողջական խնդիրների պատճառով չի կարողացել ներկայանալ աշխատանքի։ Անհրաժեշտություն էր առաջացել նշանակել ժամանակավոր պաշտոնակատար»,-ասաց նա` հրաժարվելով նշել պատճառներ, թե ինչու դրսից թեկնածու բերեցին ու նշանակեցին դպրոցի տնօրենի պաշտոնակատար:
«Ոչ չեմ նշի պատճառները, անհրաժեշտություն առաջացավ նշանակել պաշտոնակատար, եւ որ դա լինի դպրոցում չաշխատող մեկը: Եթե սա կապվում է օրեր առաջ դպրոցում տեղի ունեցածի հետ, կամ եթե նույնիսկ չի կապվում, նպատակահարմար չեմ գտնում այդ մասին խոսել, որովհետեւ կարող ենք որոշակի ազդեցություն ունենալ նախաքննության վրա:
Չեմ կարող թաքցնել, որ արդեն երկարում էր տնօրենի մրցույթի կայացումը եւ տնօրենի նշանակումը: Իրադարձություններն առաջ ընկան եւ այս դեպքից հետո հապաղելու տեղ էլ չկար:
Նշենք, որ հինգշաբթի օրը ԱԱԾ-ն ներխուժել էր Ջոն Կիրակոսյանի անվան դպրոց ու երեխաների աչքի առաջ բերման ենթարկել ֆիզիկայի ուսուցչին, ով մեղադրվում է անառակաբարո գործողություններ կատարելու մեջ:
Իսկ արդեն այսօր հայտնի դարձավ, որ տնօրենի պաշտոնակատար են բերում դրսից թեկնածուի, որն իմանալով մի շարք ծնողներ եկել էին դպրոց իրենց բողոքը հայտնելու:
Որպես դպրոցի տնօրենի պաշտոնակատար նշանակվել է Քրիստինե Դումանյանը, որի ամուսինը ԱԱԾ-ում է աշխատում։
