Մերձավոր Արևելքում հակամարտության հետագա սրումը և լայնամասշտաբ պատերազմի վերածումը կհրահրեն համաշխարհային ճգնաժամ էներգետիկ ոլորտում։ Այս նախազգուշացումն արել է Իրաքի արտգործնախարար Ֆուադ Հուսեյնը Բաղդադում իր իրանցի գործընկեր Աբբաս Արաղչիի հետ համատեղ մամուլի ասուլիսում։
«Տարածաշրջանում լայնածավալ պատերազմի սկիզբը չափազանց բացասաբար կանդրադառնա էներգակիրների արտահանման և գլոբալ նավագնացության վրա և դրանով իսկ կհրահրի համաշխարհային էներգետիկ ճգնաժամ»,- Հուսեյնի խոսքերն է մեջբերում Shafaq News պորտալը։
Արտգործնախարարն ընդգծել է, որ իրաքյան իշխանություններն անընդունելի են համարում իրենց երկրի տարածքն օգտագործել հարևան պետությունների, այդ թվում՝ Իրանի վրա հարձակումների համար, ինչպես նաև գործադրում են բոլոր ջանքերը՝ «Իրաքը պաշտպանելու հնարավոր տարածաշրջանային հակամարտությանը ցանկացած մասնակցությունից»:
Հուսեյնն ասել է, որ Իսրայելի կողմից Իրանի տարածքին հարվածելու նախապատրաստումը համարում է «վտանգավոր քայլ», ինչպես նաև զգուշացրել է, որ Գազայի հատվածում և Լիբանանում ռազմական գործողությունների շարունակությունը «սպառնում է ողջ տարածաշրջանի կայունությանը» և կոչ է արել անհապաղ դադարեցնել դրանք։
