Հունգարիայի կառավարությունը կարծում է, որ Ուկրաինայում կարգավորման գործընթացը պետք է ընթանա աստիճանաբար, և չպետք է առաջ ընկնել այս երկրին անվտանգության միջազգային երաշխիքներ տրամադրելու հարցում։ Այս մասին հայտարարել է Հունգարիայի արտաքին գործերի և արտաքին տնտեսական կապերի նախարար Պետեր Սիյարտոն՝ Անկարայում իր թուրք գործընկեր Հաքան Ֆիդանի հետ հանդիպումից հետո կայացած մամուլի ասուլիսում։
Պատասխանելով Ուկրաինային այլ երկրների անվտանգության երաշխիքներ տրամադրելու մասին լրագրողների հարցին՝ արտգործնախարարն ասել է.
«Եկեք քայլ առ քայլ առաջ գնանք այս գործընթացով, նախ բանակցենք հրադադարի մասին, հետո խաղաղ բանակցություններ վարենք՝ համաձայնության գալու համար: Նախ պետք է անենք ամենակարևորը, քանի որ եթե ամեն ինչ խառնենք, կկորցնենք դեպի խաղաղություն գնալու հնարավորությունը»:Սիջյարտոն նաև նշել է, որ ապագա միջազգային անվտանգության տեսանկյունից կարևորագույն խնդիրներից մեկը Ռուսաստանի և ԱՄՆ-ի միջև բնականոն հարաբերությունների վերականգնումն է։
