Ստամբուլի քաղաքապետ Էքրեմ Իմամօղլուի ձերբակալության ֆոնին թուրք իրավապահները ձերբակալել են ավելի քան 50 մարդու, ովքեր կասկածվում են սոցցանցերում սադրիչ գրառումներ անելու մեջ։ Այս մասին սոցցանցում հայտնել է երկրի ՆԳՆ ղեկավար Ալի Էրլիքայան։
Հինգշաբթի օրը Անկարայում և Ստամբուլում բողոքի ցույցեր են տեղի ունեցել՝ ի պաշտպանություն ձերբակալված Ստամբուլի քաղաքապետ Էքրեմ Իմամօղլուի։ Թուրքիայի ամենամեծ ընդդիմադիր Ժողովրդահանրապետական կուսակցության (CHP) առաջնորդ Օզգյուր Օզելը Ստամբուլում հանրահավաքի ժամանակ բազմիցս կոչ է արել ոստիկանությանը և քաղաքային իշխանություններին դադարեցնել պղպեղի սփրեյի օգտագործումը ցուցարարների դեմ։
Բողոքի ակցիայի ժամանակ մասնակիցները մի քանի անգամ շտապօգնություն են խնդրել։ Թուրքիայի նախագահի աշխատակազմն իր հերթին հերքել է մի շարք լրատվամիջոցների հաղորդագրությունները երկրում բողոքի ակցիաների ժամանակ ոստիկանության կողմից ռետինե փամփուշտների ենթադրյալ օգտագործման մասին:
«Մեր վարչության համակարգված ջանքերի արդյունքում բերման է ենթարկվել 54 կասկածյալ, և լրացուցիչ կասկածյալների ձերբակալման աշխատանքները շարունակվում են»,- գրել է Երլիկայան։
Նրա խոսքով՝ բողոքի ցույցերի ընթացքում տուժել է 16 ոստիկան։
