Թուրքիայի քաղաքացու կողմից Երևանի հյուրանոցներից մեկում խուլիգանություն կատարելու դեպքի մասին մանրամասներ պատմեց իրավապաշտպան Ռուբեն Մելիքյանը։ Նրա խոսքով, այդ գործողությունն իրականացվել է արցախացի մեր հայրենակցի նկատմամբ, մինչդեռ քննչական գործողություններից հետո Թուրքիայի քաղաքացին հրաժարվել է ներողություն խնդրել նրանից։
Իրավապաշտպանը նշեց, որ արցախցին շատ նեղված է, և սա միայն հյուրանոցի սեփականատիրոջ հարցը չէ։
Մելիքյանի խոսքով, պետք է լինի հրապարակային դատավարություն, իսկ Թուրքիայի քաղաքացին պետք է ներողություն խնդրի յուրաքանչյուրից, քանի որ շահառուն յուրաքանչյուրս ենք։
«Հակառակ դեպքում ես կհամարեմ ծածկադմփոց է եղել, սա պետք է լինի հանրային ուշադրության ներքո, չավարտվի նախաքննության փուլում»,-ասաց նա՝ ավելացնելով, որ սկզբնական շրջանում իրավապահ մարմինների գործողությունները կասկածներ չէին հարուցում, հետո «ընթացքն այնքան էլ իմ դուրը չի գալիս, զգում եմ հակվածություն վարույթը նախաքննության փուլում ավարտել»։
