Իրանը կոչ է անում Սիրիայի անցումային կառավարությանը պատասխանատվության ենթարկել Սիրիայի ափամերձ նահանգներում խաղաղ բնակիչների սպանությանը մասնակից անձանց։ Այս մասին հայտարարել է Սիրիայի հարցով Իսլամական Հանրապետության արտաքին գործերի նախարարի հատուկ ներկայացուցիչ Մոհամմադ Ռեզա Ռաուֆ Շեյբանին։
«Սիրիայի ափամերձ նահանգներում անմեղ մարդկանց բռնությունների և սպանությունների մասշտաբները ցնցող են: Մենք դատապարտում ենք սիրիական հասարակության տարբեր փոքրամասնությունների ներկայացուցիչ անմեղ մարդկանց սպանությունները: Այս հանցագործությունների մեղավորները պետք է պատասխանատվության ենթարկվեն», -գրել է Շեյբանին X-ում:
«Մերձավոր Արևելքի տարածաշրջանի ժողովուրդը և համաշխարհային հանրությունը ակնկալում են վճռական գործողություններ Սիրիայի ժամանակավոր կառավարությունից՝ դադարեցնելու բռնությունը, քրեական պատասխանատվության ենթարկելու և այդ գործողությունների մեղավորներին պատժելու համար», - հավելել է դիվանագետը:
Նրա խոսքով՝ «Իրանը միշտ եղել է Սիրիայի կայունության, հանգստության եւ տարածքային ամբողջականության կողմնակից»։ Ինչպես նշել է Իրանի ԱԳՆ ղեկավարի հատուկ ներկայացուցիչը, Իսրայելը և «ահաբեկչական ու ծայրահեղական խմբավորումները կարող են օգտվել Սիրիայում տիրող անկայունությունից, ինչը կհանգեցնի տարածաշրջանի խաղաղության սպառնալիքի»։
