Սիրիայի ափամերձ շրջանի Լաթաքիա քաղաքում պարետային ժամը երկարացվել է մինչև շաբաթ օրը ժամը 09.00-ն, հայտնում է Սիրիա հեռուստաընկերությունը։
Հինգշաբթի օրը ծանր մարտեր են սկսվել սիրիական անվտանգության ուժերի և նոր կառավարությանը հակադրվող զինված խմբավորումների միջև Դամասկոսում՝ Ջեբլա քաղաքում, Լաթաքիա քաղաքի մի քանի շրջաններում և Լաթաքիա և Տարտուս նահանգների լեռնային շրջաններում։
Ուրբաթ գիշերը բանակի և ներքին գործերի նախարարության լրացուցիչ ստորաբաժանումներ են ժամանել Տարտուս և Լաթաքիա նահանգներ, իսկ բանակը կիրառել է մարտական ուղղաթիռներ։ Տեղի իշխանությունները պարետային ժամ են սահմանել՝ սրման ֆոնին:
«Լաթաքիա նահանգի վարչակազմը հայտարարել է քաղաքում պարետային ժամի երկարաձգման մասին մինչև շաբաթ առավոտյան ժամը 09.00»,- ասվում է հաղորդագրության մեջ։
Al Jazeera հեռուստաալիքի փոխանցմամբ՝ Սիրիայի պաշտպանության նախարարության ուժերը ժամանել են Լաթաքիա նահանգի Ջեբլա քաղաքի արվարձաններ և կատաղի մարտեր են մղում նախկին նախագահ Բաշար ալ Ասադի կողմնակիցների հետ։
2024 թվականի նոյեմբերի վերջին սիրիական ընդդիմության զինված ուժերը լայնածավալ հարձակում սկսեցին սիրիական բանակի դիրքերի դեմ և դեկտեմբերի 8-ին մտան Դամասկոս, Ասադը հրաժարական տվեց Սիրիայի նախագահի պաշտոնից և լքեց երկիրը։
