Փետրվարի 20-ը պատմական օր է:
Ուղիղ 37 տարի առաջ՝ 1988 թ. փետրվարի 20-ին, Լեռնային Ղարաբաղի ինքնավար մարզի (ԼՂԻՄ) ժողովրդական պատգամավորների մարզային խորհրդի 20-րդ գումարման արտահերթ նստաշրջանն ընդունեց իր հայտնի որոշումը, որով դիմում էր ներկայացվելու Ադրբեջանի և Հայաստանի Գերագույն խորհուրդներին՝ ԼՂԻՄ-ը Ադրբեջանական ԽՍՀ կազմից Հայկական ԽՍՀ կազմ տեղափոխելու, ինչպես նաև՝ ԽՍՀՄ Գերագույն խորհրդին՝ այդ դիմումը բավարարելու մասին:
Ու թեև նորագույն շրջանում Արցախյան հիմնահարցի շուրջ զարգացումները սկսվել են 1988 թ. փետրվարից առաջ, այնուամենայնիվ, Շարժման խորհրդանշական սկիզբ ընդունված է համարել 1988 թ. փետրվարի 20-ի ԼՂԻՄ մարզային խորհրդի պատմական որոշումը, որով սկիզբ դրվեց Արցախի ազատագրմանն ու Հայաստանի անկախության գործընթացին:
Այսօր վաղ առավոտից «Եռաբլուր» էին այցելում բոլոր այն հայտնի դեմքերը, քաղաքական ղեկավարներն ու գործիչները, ովքեր չեն ուրացել Արցախն ու Արցախյան շարժման, Արցախյան ազատամարտի փառավոր պատմությունը, բոլոր նրանք, ովքեր չեն վախենում Ղարաբաղի փոխարեն Արցախ ասել:
Նրանք եկել էին հարգելու ուխտատեղի դարձած այս սրբավայրում հանգչող այն անմահ հերոսների հիշատակը, ովքեր չվախեցան ո՛չ թշնամուց, ո՛չ կռվից, ո՛չ մահից ու իրենց կյանքը տվեցին, որպեսզի ազատ Արցախն ապրի:
Մանրամասները՝ տեսանյութում:
Հեղինակ՝ Արամ Սարգսյան
