Ֆրանսիայի նախագահ Էմանուել Մակրոնը հայտարարել է, որ ԱՄՆ նախագահ Դոնալդ Թրամփի նախաձեռնությունը Գազայի հատվածի երկարաժամկետ սեփականության մասին անընդունելի է Փարիզի համար։
«Գազան անապատային տարածք չէ, այլ երկիր, որտեղ երկու միլիոն մարդ ապրում է և ցանկանում է մնալ», - CNN-ին տված հարցազրույցում ասել է Մակրոնը։
Նրա խոսքով՝ անհրաժեշտ է Գազայի հատվածի համար քաղաքական լուծում գտնել, որը «հարգում է Պաղեստինի ժողովրդի՝ սեփական պետություն ունենալու ցանկությունը»։
Նա նաև կոչ է արել հարգել Եգիպտոսի և Հորդանանի ինքնիշխանությունը։ Փետրվարի 4-ին Թրամփը Սպիտակ տանը կայացած բանակցություններից հետո Իսրայելի վարչապետ Բենիամին Նեթանյահուի հետ համատեղ մամուլի ասուլիսում հայտարարեց, որ Վաշինգտոնը դիտարկում է Գազայի հատվածի երկարաժամկետ սեփականությունը՝ այն զարգացնելու համար՝ ի շահ Մերձավոր Արևելքում խաղաղության։
