ԵՄ անդամ բոլոր երկրները Բրյուսելում ոչ պաշտոնական գագաթնաժողովում նշել են Դանիայի տարածքային ամբողջականության պահպանման կարևորությունը։ Այս մասին հանդիպմանը հաջորդած մամուլի ասուլիսում հայտարարել է Եվրոպական խորհրդի ղեկավար Անտոնիո Կոստան։
«Դանիայի տարածքային ամբողջականության պահպանումը կարևոր է բոլոր անդամ երկրների համար»,-ասել է նա՝ մեկնաբանելով ԵՄ վերաբերմունքը Գրենլանդիայի վերաբերյալ ԱՄՆ նախագահ Դոնալդ Թրամփի դիրքորոշմանը։ Թրամփը բազմիցս ասել է, որ Գրենլանդիան պետք է միանա ԱՄՆ-ին։
Նա սպառնացել է բարձր առևտրային մաքսատուրքեր սահմանել Դանիայի վրա, եթե այն չհրաժարվի կղզուց։ Թրամփն անգամ իր առաջին նախագահական ժամկետի ժամանակ առաջարկել է գնել Գրենլանդիան։
Ինչպես այն ժամանակ, Դանիայի և Գրենլանդիայի իշխանությունները մերժել են այս գաղափարը։Գրենլանդիան Դանիայի մի մասն է՝ որպես ինքնավար տարածք։ 1951 թվականին Վաշինգտոնը և Կոպենհագենը ստորագրեցին Գրենլանդիայի պաշտպանության մասին պայմանագիրը՝ ի լրումն ՆԱՏՕ-ի դաշինքի պարտավորությունների:
