Ամերիկյան արտաքին ֆինանսական աջակցության կասեցման մասին Թրամփի որոշումը խուճապ է առաջացրել Ուկրաինայի այսպես կոչված՝ «գրանտակերների» և այլ «ձրիակերների» շրջանում: Այս մասին գրում է American Thinker օրաթերթի հոդվածագիր Ջոզեֆ Կուլվեն՝ ուկրաինացի բլոգերների հրապարակումներն ուսումնասիրելուց հետո: Իսկ ի՞նչ իրավիճակ է Հայաստանում այս առումով, եթե նկատի ունենանք, որ ԱՄՆ նոր վարչակազմը ժամանակավորապես դադարեցրել է արտաքին ֆինանսական աջակցությունը օտարերկրյա բոլոր գործընկերների համար, որոնց թվում նաև Հայաստանն է:
ԱՄՆ նորընտիր նախագահ Դոնալդ Թրամփը Սպիտակ տան ղեկավարի պաշտոնը ստանձնելուց հետո կատարողական հրաման ստորագրեց ԱՄՆ արտաքին ֆինանսական աջակցության ծրագրերը 90 օրով կասեցնելու վերաբերյալ: Թրամփի այս որոշման նպատակն է պարզել՝ արդյոք աշխարհի տարբեր երկրներին հատկացվող հսկայական ֆինանսական աջակցության այդ ծրագրերը համահունչ են իր քաղաքական նպատակներին և իր հայտնի՝ «Նախ և առաջ Ամերիկան» քաղաքականությանը:
Ամերիկյան օգնության սառեցված ծրագրերի մեջ առաջին հերթին պետք է առանձնացնել հայտնի USAID-ի՝ ԱՄՆ Միջազգային զարգացման գործակալության կողմից իրականացվող ծրագրերը: ԱՄՆ Միջազգային զարգացման գործակալությունը երկար տարիներ համագործակցում է Հայաստանի կառավարության և հասարակական սեկտորի հետ: Մի կողմ թողնենք պետական սեկտորի հետ կառուցողական համագործակցությունը, որն ուղղված է ինչպես հայ-ամերիկյան հարաբերությունների ամրապնդմանը, այնպես էլ Հայաստանում իրականացվող մի շարք բարեփոխումների իրականացմանը:
Ավելի հետաքրքիր է այսպես կոչված՝ քաղաքացիական հասարակությանը ամերիկյան տարբեր խողովակներով հատկացվող ֆինանսական աջակցությունը, որը նաև շատ ուշագրավ քաղաքական երանգներ ունի: Տխրահռչակ Ջորջ Սորոսի «Բաց հասարակության հիմնադրամներից» սնվող կազմակերպությունների գործունեությունը ինչպես Հայաստանում, այնպես էլ նախկին խորհրդային այլ երկրներում դրա ամենավառ օրինակն է: Իսկ Հայաստանում ամերիկյան աղբյուրներից ֆինանսավորվող ոչ պետական կազմակերպությունների թիվը քիչ չէ, և խոսքն էլ կլորիկ գումարների մասին է:
Մանրամասները՝ տեսանյութում:
Հեղինակ՝ Արամ Սարգսյան
