Վրաստանի իրավապահները Թբիլիսիի մուտքի մոտ բողոքի ակցիայի ժամանակ ձերբակալել են մի քանի ընդդիմադիրի, որոնց թվում են «Կոալիցիա հանուն փոփոխությունների» կուսակցության առաջնորդ Նիկա Մելիան և «Եվրոպական Վրաստան» քաղաքական ուժի անդամ Գիգի Ուգուլավան, հաղորդում է Mtavari Arkhi հեռուստաընկերությունը։ Ըստ տվյալների՝ ձերբակալվածների թվում կան նաև այլ ընդդիմադիրներ։
Կիրակի ավելի վաղ բողոքող քաղաքացիները հավաքվել էին Թբիլիսիի մուտքի մոտ և փորձել մասնակի փակել մայրուղին։ Ոստիկանությունը նրանց թույլ չի տվել դա անել, ինչից հետո սկսվել են ձերբակալությունները։ Վրաստանի ՆԳՆ-ն դեռևս պաշտոնական հայտարարություն չի արել ձերբակալվածների թվի մասին։
«Վրացական երազանքը» արագացված կերպով օրենք է ընդունել, որով ճանապարհների փակումը դարձել է քրեական օրենսգրքով պատժելի արարք։ Հանրահավաքից առաջ ՆԳՆ-ն երկու նախազգուշական հայտարարություն էր տարածել:
Քաղաքացիները պահանջում են երկրում նոր խորհրդարանական ընտրություններ անցկացնել և ազատ արձակել բողոքի ակցիաների ժամանակ բերման ենթարկված քաղաքացիներին։
Բողոքի ցույցերը սկսվել են այն բանից հետո, երբ 2024 թվականի նոյեմբերի 28-ին վարչապետ Իրակլի Կոբախիձեն հայտարարեց, որ որոշվել է դադարեցնել Եվրամիությանը երկրի անդամակցության շուրջ բանակցություններ սկսելու հարցի քննարկումը մինչև 2028 թվականը:
Բողոքի ակցիաների ընթացքում իրավապահները բերման են ենթարկել մի քանի հարյուր մարդու։
