Այսօր ոչ մի արևմտաեվրոպական երկիր պաշտպանված չէ ներքին գործերին միջամտությունից, հայտարարել է ՌԴ նախագահի մամուլի քարտուղար Դմիտրի Պեսկովը։
Ավելի վաղ Սլովակիայի վարչապետ Ռոբերտ Ֆիցոն հայտարարել էր, որ հանրապետությունում գործում է օտարերկրյա փորձագետների խումբ, որոնք առնչություն ունեն Վրաստանի և Ուկրաինայում Մայդանի իրադարձությունների հետ՝ նպատակ ունենալով տապալել երկրում գործող իշխանությունը։ Սերբիայի նախագահ Ալեքսանդր Վուչիչը նույնպես ասել է, որ Արեւմուտքի օտարերկրյա գործակալները փորձում են Սերբիայում գունավոր հեղափոխություն կազմակերպել ուսանողների եւ բողոքի այլ մասնակիցների օգնությամբ։
«Այս դեպքում մեր գործընկերները դեռ ավելի լավ գիտեն, երբ նման եզրահանգումներ են անում, հետևաբար, ակնհայտ է, որ ոչ մի երկիր, այդ թվում՝ արևմտաեվրոպական երկրներ, այսօր անձեռնմխելի չեն իրենց ներքին գործերին միջամտությունից։
Եվ, իհարկե, այս երկրներից շատերը, նույնիսկ եվրոպական խոշորագույն երկրները, վերջերս են նման բավականին ագրեսիվ միջամտության օրինակներ ունեցել։
Բայց մեկ այլ բան այն է, որ որոշ երկրներ վճռական միջոցներ են ձեռնարկում նման միջամտության դեմ պայքարելու համար, իսկ որոշ երկրներ համբերատար նախընտրում են դիմանալ բոլոր նվաստացումներին»,- լրագրողներին ասել է Պեսկովը՝ պատասխանելով այն հարցին, թե ինչպես է Կրեմլն ընկալում եվրոպական երկրների ներքին գործերին միջամտության մասին տեղեկատվությունը։
