Կոլումբիայի նախագահ Գուստավո Պետրոն երկրում արտակարգ դրություն է հայտարարել՝ հանրապետության հյուսիսում զինված խմբավորումների միջև բախումների պատճառով, այս մասին նա հայտնել է X սոցիալական հարթակում:
«Հայտարարվում է հատուկ դրություն ներքին ցնցումների պատճառով և արտակարգ դրություն տնտեսության ոլորտում: Հուսով եմ՝ դատական իշխանությունը կաջակցի», - գրել է նա։ Իր հերթին ՏԱՍՍ-ը հիշեցնում է, որ հունվարի 17-ին Պետրոն հայտարարել է Ազգային ազատագրության բանակի (ԱԱԲ) ապստամբների հետ հաշտության բանակցությունների դադարեցման մասին՝ նրանց բախումների պատճառով այլ զինված խմբավորումների հետ, որոնք կազմավորվել են «Կոլումբիայի հեղափոխական զինված ուժերի (ԿՀԶՈՒ) նախկին անդամների կողմից Կատատումբոյի տարածաշրջանում։
Բռնության զոհ են դարձել տասնյակ մարդիկ, ավելի քան 10 000 մարդ ստիպված է եղել լքել իր տունը։ԱԱԲ-ն, որի կազմում կա մի քանի հազար մարդ, մնացել է երկրում միակ խոշոր ապստամբ խմբավորումն այն բանից հետո, երբ կառավարությունը 2016 թվականին հաշտության համաձայնագիր է կնքել ԿՀԶՈՒ-ի հետ: Այդ փաստաթուղթը վերջ է դրել արյունալի հակամարտությանը, որը շարունակվել է ավելի քան կես դար և խլել ավելի քան 250 000 մարդու կյանք։ 2022 թվականի նոյեմբերին իշխանությունները հայտարարել են ԱԱԲ-ի հետ երկխոսություն սկսելու մասին։ Երկխոսության գործընթացը մի քանի անգամ դադարել և վերսկսվել է:
