Կատարի արտաքին գործերի նախարարության պետնախարար Մուհամմեդ ալ-Խուլեյֆին և Սիրիայի նոր վարչակազմի արտաքին գործերի նախարար Ասադ Հասան ալ-Շիբանին հեռախոսով քննարկել են հանրապետությունում տիրող իրավիճակը։ Այս մասին հայտնում է էմիրության արտաքին գործերի նախարարությունը։
Զրույցի ընթացքում ալ-Խուլեյֆին նաև հավաստիացրել է Ալ-Շիբանիին «Կատարի շարունակական աջակցությունը Սիրիային բոլոր ոլորտներում, հատկապես հումանիտար ոլորտում»: Իր հերթին, Սիրիայի անցումային կառավարության արտաքին գործերի նախարարության ղեկավարը շնորհակալություն է հայտնել սիրիացի ժողովրդի նկատմամբ Դոհայի «հաստատ դիրքորոշման համար»։
Հունվարի 3-ին ալ-Շիբանին հայտարարել է, որ մտադիր է առաջիկա օրերին այցելել Կատար, Արաբական Միացյալ Էմիրություններ և Հորդանան: Սիրիայի նոր վարչակազմը հույս ունի, որ այցը կնպաստի հանրապետությունում «կայունության և անվտանգության պահպանմանը», ինչպես նաև երկրի տնտեսության վերականգնմանը:
Հունվարի 1-ին Սիրիայի անցումային կառավարության պատվիրակությունը Դամասկոսում իշխանափոխությունից հետո առաջին արտասահմանյան այցով ժամանել է Էր Ռիադ։ Հինգշաբթի օրը Ալ-Շիբանին Սաուդյան Արաբիայի մայրաքաղաքում հանդիպել է թագավորության արտաքին գործերի նախարար արքայազն Ֆեյսալ բեն Ֆարհան Ալ Սաուդի հետ։
