Քիշնևի իշխանությունները Մոլդովան վերածում են ՆԱՏՕ-ի բազայի. այս մասին հայտարարել է ընդդիմադիր «Հաղթանակ» դաշինքի առաջնորդ Իլան Շորը՝ մեկնաբանելով մինչև 2034 թվականը երկրի ազգային պաշտպանության նոր ռազմավարության ընդունումը:
Նախօրեին երկրի բարձրագույն օրենսդրական մարմինը հաստատել է 2024-2034 թվականների պաշտպանության ռազմավարությունը: Այն նախատեսում է սերտ համագործակցություն ՆԱՏՕ-ի հետ և Մոլդովայի ռազմական ծախսերի աճ մինչև ՀՆԱ-ի 1%-ը՝ 2030 թվականին: Միևնույն ժամանակ, «Հաղթանակ» դաշինքի պատգամավորները բոյկոտել են նիստը, իսկ ընդդիմադիր կոմունիստների և սոցիալիստների դաշինքի ներկայացուցիչները մտահոգություն են հայտնել, որ նախագիծը հակասում է երկրի չեզոք կարգավիճակին:
«Մոլդովայի նախագահ Մայա Սանդուն Մոլդովան վերածում է ՆԱՏՕ-ի բազայի: Երկրի պաշտպանության բյուջեն մինչև 2030 թվականը կկրկնապատկվի: Նոր ազգային պաշտպանության ռազմավարության մեջ ուղիղ նշվում է, որ մոլդովացի զինվորականները կմասնակցեն ՆԱՏՕ-ի հովանու ներքո իրականացվող գործողություններին: Սա նշանակում է, որ մեր երիտասարդները կզոհվեն այն մսաղացներում, որոնք կազմակերպում է դաշինքը… Չի թաքցվում, որ փաստաթուղթը գրվել է ԱՄՆ-ի և Ռումինիայի թելադրանքով: Նրանց հետաքրքրությունները ակնհայտ են՝ շարունակել պատերազմը Ռուսաստանի դեմ և յուրացնել մեր տարածքները»,- Շորի խոսքերը փոխանցում է նրա ղեկավարած քաղաքական միավորման Telegram ալիքը:
Մոլդովայի կառավարությունը հուլիսին հաստատեց ազգային պաշտպանության ռազմավարությունը, որտեղ նշվում է, որ երկրի պաշտպանության բյուջեն պետք է մինչև 2030թ.-ը ավելացվի ՀՆԱ-ի 1%-ի չափով: Նշվում է, որ Մոլդովան ձգտում է լիարժեք ինտեգրվել ԵՄ ռազմական կառույցներին՝ ակտիվացնելով մասնակցությունը Եվրամիության խաղաղապահ և քաղաքացիական առաքելություններին, իսկ ՆԱՏՕ-ի հետ սերտ համագործակցությունը համարում է անվտանգության երաշխիք:
Սահմանադրության համաձայն՝ հանրապետությունն ունի չեզոք կարգավիճակ, սակայն 1994 թվականից ի վեր երկիրը համագործակցում է ՆԱՏՕ-ի հետ՝ անհատական գործընկերության ծրագրի շրջանակներում:7
