Ռուսաստանի անվտանգության դաշնային ծառայության (ԱԴԾ) աշխատակիցները կանխել են Ուկրաինայի դեմ ռազմական գործողություններին մասնակցող Պաշտպանության նախարարության բարձրաստիճան աշխատակիցների, ինչպես նաև նրանց ընտանիքների անդամների նկատմամբ մահափորձեր։ ԱԴԾ-ի տվյալներով՝ սպանությունների նախապատրաստությունը կազմակերպել են ուկրաինական հատուկ ծառայությունները, այս մասին հաղորդում է «Կոմերսանտ» պարբերականը։
Բերման է ենթարկվել չորս ռուսաստանցի։ Նրանց սպառնում է մինչև ցմահ ազատազրկում։Ինչպես հայտնել է ԱԴԾ-ն, հանցագործներից մեկը 2020 թվականից Ուկրաինայում բնակվող ռուսաստանցի է։ Նա նոյեմբերին Մոլդովայի և Վրաստանի տարածքով ժամանել է Մոսկվա՝ արտաքսվածի անվան տակ։
Ռուսաստանի մայրաքաղաքում նա գաղտնարանից վերցրել է ինքնաշեն պայթուցիկ սարք, որը քողարկված է եղել որպես արտաքին մարտկոց։ Նա պետք է այն տեղադրեր Պաշտպանության նախարարության բարձրաստիճան ղեկավարներից մեկի ծառայողական մեքենայի տակ, որի վարորդը եղել է ձերբակալվածի մերձավոր ազգականը։
Ռմբակոծությունը պետք է իրականացվեր հեռավար կերպով։Երկրորդ ձերբակալվածը հարցաքննության ժամանակ ասել է, որ գնացել էր Ուկրաինա, որտեղ հավաքագրվել է ուկրաինական հատուկ ծառայությունների կողմից։ Դրանից հետո նրան ուղարկել են Ռուսաստան՝ ՊՆ բարձրաստիճան աշխատակիցներին, ինչպես նաև նրանց ընտանիքների անդամներին հետևելու նպատակով։ Նա ստացված ողջ տեղեկատվությունը փոխանցել է ուկրաինացի կուրատորին՝ ապագա ահաբեկչություններ կազմակերպելու համար։
ԱԴԾ-ի տվյալներով՝ ևս երկու ռուսաստանցի ներգրավված են եղել մեկ այլ զինծառայողի սպանության նախապատրաստման մեջ։ Նրանք պետք է ՊՆ աշխատակցին հանձնեին թղթապանակ՝ փաստաթղթերով, որոնցում պայթուցիկ էր թաքցված։ Չորս ձերբակալվածներից առգրավվել են ինքնաշեն պայթուցիկ սարքեր և կապի միջոցներ։
Հարուցվել են քրեական գործեր՝ պայթուցիկ նյութերի և պայթուցիկ սարքերի ապօրինի շրջանառության, ահաբեկչությունների նախապատրաստման և պետական դավաճանության համար։
Օրեր առաջ Մոսկվայում տեղի ունեցած պայթյունի հետևանքով զոհվել էր ՌԴ զինված ուժերի ռադիացիոն, քիմիական և կենսաբանական պաշտպանության զորքերի պետ Իգոր Կիրիլովը, ինչպես նաև նրա օգնական Իլյա Պոլիկարպովը։ Նրանց սպանությունն, ըստ տարբեր տեղեկությունների, իրականացրել են Ուկրաինայի հատուկ ծառայությունները։
