Հայաստանը շարունակում է մնալ ԱՊՀ և Եվրասիական տնտեսական միության (ԵԱՏՄ) կարևոր անդամ, ասել է ՌԴ նախագահի մամուլի քարտուղար Դմիտրի Պեսկովը։ Նրա խոսքերը մեջբերում է ՌԻԱ Նովոստին։
«Հայաստանը դադարեցրել է մասնակցությունը ՀԱՊԿ ձևաչափին, բայց, այնուամենայնիվ, Հայաստանը դեռևս շատ կարևոր անդամ է և՛ ԵԱՏՄ-ում, և՛ ԱՊՀ-ում։ Այս մասնակցությունից և՛ Հայաստանը, և՛ հայ ժողովուրդը մեծ դիվիդենտներ են ստանում»,- ասել է Պեսկովը։
Նրա խոսքով՝ Հայաստանի աշխատանքը ԱՊՀ-ում երկուստեք շահավետ է․ «Դրանում շահագրգռված է և՛ ԱՊՀ-ն, և՛ մեր հայ ընկերները»։
ԱՊՀ երկրների ղեկավարների հանդիպումն ավանդաբար տեղի է ունենում ամեն տարի դեկտեմբերի վերջին Սանկտ Պետերբուրգում։ Այս անգամ ոչ պաշտոնական գագաթնաժողովը տեղի կունենա Լենինգրադի մարզի Իգորա լեռնադահուկային հանգստավայրի համալիրում՝ Սանկտ Պետերբուրգի մոտ։
