Սիրիայում բազմահազարանոց ցույցեր են տեղի ունեցել զինյալների կողմից սուրբծննդյան տոնածառի հրկիզման պատճառով

Սիրիայում ցույցեր են սկսվել այն բանից հետո, երբ Համա քաղաքի մերձակայքում զինյալներն այրել են սուրբծննդյան տոնածառը։ 

BBC-ն հաղորդում է, որ ըստ սոցիալական ցանցերում տարածված տեսանյութերի՝ դեկտեմբերի 23-ի երեկոյան դիմակավորված զինյալները հրկիզել են Սիրիայի կենտրոնական աս-Սուքեյլաբիյա քաղաքի գլխավոր հրապարակում գտնվող տոնածառը։

Քաղաքը հիմնականում բնակեցված է քրիստոնյաներով։ Հազարավոր ցուցարարներ ամբողջ երկրում դուրս են եղել ցույցերի՝ պահանջելով, որ նոր իսլամիստ ղեկավարները պաշտպանեն կրոնական փոքրամասնությունների իրավունքները։

Սիրիայում իշխանափոխություն իրականացրած հիմնական խմբավորման՝ «Հայաթ Թահրիր աշ-Շամ»-ի (ՀԹՇ) ղեկավարությունը հայտարարել է, որ հրկիզման համար պատասխանատու տղամարդիկ եղել են օտարերկրյա մարտիկներ, որոնք բերման են ենթարկվել։ ՀԹՇ-ի կրոնական պաշտոնյաներից մեկն աս-Սուքեյլաբիյայում հավաքված ակցիայի մասնակիցներին հավաստիացրել է, որ տոնածառը մինչև առավոտ կվերականգնվի։

BBC-ն  ընդգծում է, որ տղամարդու ձեռքին եղել է խաչ՝ ի նշան համերաշխության, ինչը իսլամիստ պահպանողականները երբեք չէին անի։

Դեկտեմբերի 24-ին ավելի շատ ցուցարարներ են դուրս եկել փողոց։ Սիրիայում բնակվում են բազմաթիվ էթնիկ և կրոնական խմբեր, այդ թվում՝ հայեր, քրդեր, ասորիներ, քրիստոնյաներ, դրուզներ, ալավիներ։Նոյեմբերի վերջից Սիրիայի հակակառավարական ուժերը գրավել էին երկրի մի քանի խոշոր քաղաքներ։

Դեկտեմբերի 8-ին ընդդիմության ներկայացուցիչները մտել էին Դամասկոս և պետական ​​հեռուստատեսությամբ հայտարարել, որ վերահսկողություն են հաստատել երկրի վրա։ Սիրիայի նախագահ Բաշար ալ-Ասադն ընտանիքի հետ ապաստան է ստացել Մոսկվայում։

Սիրիայում ստեղծվել է անցումային կառավարություն, որը ղեկավարում է Մուհամեդ ալ-Բաշիրը։ ՀԹՇ-ն դեռ ահաբեկչական է համարվում տարբեր երկրների և կազմակերպությունների, այդ թվում՝ ԱՄՆ-ի, ԵՄ-ի, Մեծ Բրիտանիայի, Ռուսաստանի և ՄԱԿ-ի կողմից։ Այնուամենայնիվ, այս դիրքորոշումը կարող է փոխվել տարբեր երկրների ներկայացուցիչների և խմբավորման ղեկավարության միջև հանդիպումներից հետո։